Служба на пренесение честных мощей преподобной Евфросинии Полоцкой
К иими похвальными песньми ныне ублажим тя в честнем празднице твоего пренесения, преподобная Евфросиние? Духовно празднующе просим: молися победы православному воинству нашему на враги даровати, тебе бо теплую ко Владыце молитвенницу стяжахом, подающую мирови велию милость.
Р адуйся, земле Полотская, красуйся и ликуй, обитель Спасова: днесь бо светило великое паки возсия тебе – многоцелебныя мощи всечестныя и святыя Евфросинии, просвещающия страну нашу богодарованными чудесы. Сии яко источник неисчерпаемый показашася, яко струи точат исцеления с верою приходящим к ним: дарует бо преподобная здравие неоскудно болящим, во гресех великое врачевание и Христа молит даровати душам нашим велию милость.
Р адуйся, преподобная мати Евфросиние, ты бо, ангельское житие на земли поживши, пощением и воздержанием плоть духови покорила еси, и свет Полотстей земли явилася еси. Темже украсилася еси венцем нетления, блаженная, и Спасу Жениху твоему обитель себе соделала еси, и дарования благодатнаго от Него сподобилася еси: помогати в скорбех и обстояниих приходящим с верою и любовию к мощем твоим и празднующим честное их пренесение. Моли Спаса даровати душам нашим мир и велию милость.
П риидите, людие Полотския страны, молебными песньми нашея заступницы и покровительницы честное пренесение радостно восхвалим: сия бо скорбящия божественне утешает, обидимыя избавляет, сия милостынею от трудов своих нищия снабди и того ради прият стократное воздаяние. К ней убо ныне возопиим: молися, преподобная Евфросиние, ко Спасу всех умирити и утвердити в православии землю нашу и спасти души наша.
Слава, глас тойже:
Р адуйся и веселися, обитель Спасова, светло торжествуй, земле Полотская, ликуйте, людие: днесь созывает нас преподобныя матере нашея пресветлое торжество. Приидите убо, светло празднуим пришествие многоцелебных мощей ея, глаголюще: радуйся, Евфросиние, невесто Христова всечестная; радуйся, богомудрая наставнице святых дев; радуйся, скорбящим душею божественное утешение, и обидимым защитнице, и всем в православии чтущим тя тихое пристанище. Темже, окрест стояще всечестных мощей твоих, молебно к тебе руце простираем и умиленно просим утвердити ны в вере и благочестии, миру мир даровати и душам нашим велию милость.
И ныне, Богородичен:
В Чермнем мори Неискусобрачныя Невесты образ написася иногда: тамо Моисей, разделитель воды, зде же Гавриил, служитель чудесе; тогда глубину шествова немокренно Израиль, ныне же Христа роди безсеменно Дева; море по прошествии Израилеве пребысть непроходно, Непорочная по рождестве Еммануилеве пребысть нетленна. Сый и прежде Сый, явлейся яко Человек, Боже, помилуй нас.
Вход. Прокимен дне. И чтения.
П ремудрости Соломоновы чтение (главы 5 и 6):
П раведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение Свое и вооружит тварь в месть врагом. Облечется в броня правды и возложит шлем, суд нелицемерен. Приимет щит непобедимый, преподобие. Поострит же напрасный гнев во оружие; споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы, и, яко вихор, развеет их и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.
П ремудрости Соломоновы чтение (глава 3):
П раведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему. Яко благодать и милость в преподобных Его и посещение во избранных Его.
П ремудрости Соломоновы чтение (глава 4):
П раведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его, сего ради потщася от среды лукавствия. Людие же видевше и не разумевше, ниже положше в помышлении таковое. Яко благодать и милость в преподобных Его, и посещение во избранных Его.
На литии стихиры, глас 1:
П о завету твоему не оставила еси удела твоего, мати наша Евфросиние, но возвратилася еси во град Полотск, во обитель твою, в нейже прежде Духом Святым освятившися, была еси игумения и пасла еси духовная чада твоя многотрудно, просияла бо еси делы благими, и многи ко Христу привела еси, и Крест Честный твоей обители завещала еси. Отонудуже востекла еси во град Иерусалим видети и лобызати Гроб Спаса Христа, и тамо Господь прият душу твою, водворив в Горний Иерусалим, святое же тело твое, чудно сподобив нетления, пресели во град Киев, идеже и упокои тя на многая лета со святыми Русския земли. Ныне же град и обитель твоя, паки видевше тя в себе, возвеселишася о возвращении твоем и, яко дар многоценен, приемше мощи твоя, вопиют ко Спасу: молитвами, Христе, преподобныя матере Евфросинии, даруй людем Твоим в скорбех утешение и душам нашим велию и богатую милость.
П риидите, вернии, хвалами сошедшеся, ныне составим торжество в честнем празднице чуднаго пренесения мощей блаженныя Евфросинии и, духовно радующеся, к ней возопиим: умоли Христа Спаса православному воинству нашему победы на враги даровати, тебе бо молитвенницу ко Владыце теплу стяжахом, подающую нам велию милость.
Слава, глас 8:
Б лагоухает, сияющи, рака мощей твоих, преподобная Евфросиние, всем верным исцеление душ и телес дарующи. Темже тя молим богодарованное тебе стадо в мире соблюсти, православие утвердити, люди укрепити, да вси тебе, яко заступление наше и молитвенницу к Богу, непрестанно величаем.
И ныне, Богородичен, глас тойже:
В ладычице, приими молитвы раб Твоих и избави нас от всякия нужды и печали.
На стиховне стихиры, глас 8:
П риидите, людие, днесь честное преподобныя матере нашея торжество благочестно песньми почтим: та бо воистину Святаго Духа осияние от юности сподобися прияти, воздержанием тело свое утончивши, и душевною чистотою света Трисолнечнаго заря явися, и ныне молится о чтущих любовию память ея.
Стих: Ч естна пред Господем смерть преподобных Его.
О преславное чудо! Божиим мановением нетленное тело твое, преподобная мати, из Киева паки во удел твой пришед, водворися почивати ту, по завету твоему, во веки. Вернии же людие, сретше тя, радостию и любовию взывают: молитвами преподобныя, Христе Боже, спаси души наша, яко Милосерд.
Стих: Б лажен муж, бояйся Господа, в заповедех Его восхощет зело.
В озсия днесь пресветлое торжество, мати богомудрая Евфросиние: ты бо от юности Богу прилепилася еси и Того стопам последовала еси, мирскую же славу оставила еси и ныне на небесех царствуеши. Мы же, покланяющеся мощем твоим, верно от души Христа славословим, давшаго нам тебе, теплую молитвенницу к Богу, к Немуже молися о нас, чтущих и светло празднующих твое пренесение, спастися душам нашим.
Слава, глас тойже:
Я ко светозарная звезда, во обители Спаса возсияла еси учением словес твоих, Евфросиние приснопамятная. Ты бо премудрая наставница показалася еси, образ являющи словом, житием, кротостию и любовию стаду твоему, научающи князи и вся люди вражду и междоусобия отметати, в любви же, мире и соединении нераздельнем пребывати. По отшествии же твоем на место, идеже стоясте нозе Господни, и оттуду в Горний Иерусалим не восхотела еси, мати наша, град и обитель твою оставити, якоже прорекла еси, но духом молитвы и любве присно с нами пребывающи, ныне и мощьми твоими нетленными из града Киева возвратилася еси, да ублажаем тя со псалмы и песньми, и святое, и всечестное пренесение празднуем, чтуще память твою.
И ныне, Богородичен:
Б езневестная Дево, Яже Бога неизреченно заченши плотию, Мати Бога Вышняго, Твоих рабов мольбы приими, Всенепорочная, всем подающи очищение прегрешений, ныне наша моления приемлющи, моли спастися всем нам.
По Ныне отпущаеши: тропарь, глас 3.
Веселися, земле Полотская, красуйся и ликуй, обитель Спасова, се бо Господь исполни желание сердца вашего: духовная мати ваша и предстательница, Евфросиния богомудрая, яко птица, возлете от града Киева и, яко горлица, обрете гнездо свое во обители древняго удела своего, идеже собирает птенцы своя под криле свои, сохранити и утвердити я в правоверии, пришествием многоцелебных мощей своих просветити омраченныя, собрати расточенныя, разогнати тьму искушений и бед от вопиющих верно: спасай нас молитвами твоими, яко предстательница наша, преподобная мати Евфросиние.
На Бог Господь: тропарь пренесения, дважды.
Слава, и ныне, праздника, или Богородичен, глас 3:
Т я, ходатайствовавшую спасение рода нашего, воспеваем, Богородице Дево: плотию бо, от Тебе восприятою, Сын Твой и Бог наш, Крестом восприим страсть, избави нас от тли, яко Человеколюбец.
По 1-м стихословии седален, глас 1:
П ресветлое пренесение мощей твоих днесь торжествующе, молим тя, преподобная Евфросиние: Спаса и Господа моли прилежно всем подати прегрешений прощение.
Слава, и ныне, Богородичен:
У пование христиан, Пресвятая Дево, Егоже родила еси Бога, паче ума и слова, непрестанно моли с Вышними Силами подати оставление грехов и исправление жития верою и любовию присно Тя славящым.
По 2-м стихословии седален, глас 4:
Ж итие во Иерусалиме благочестно скончавши, вместилище благодати Духа Святаго явилася еси в нетлении честнаго тела твоего, просвещающи к тебе верою притекающия, преподобная, темже моли Владыку и Господа просветити душы наша, радостию сретающих тя, Евфросиние, богомудрая мати наша.
Слава, и ныне, Богородичен:
О бновила еси, Чистая, силою из Тебе рождшагося Господа истлевшее во страстех мертвенное существо земнородных и воздвигла еси вся от смерти к жизни нетления. Темже Тя блажим вси, Дево Препрославленная, якоже прорекла еси.
По полиелеи седален, глас 8:
П рославляет, мати, тебе ныне земля Полотская, юже от еретических обстояний и скорбей избавляеши, богоблаженная Евфросиние, ангелов собеседница и православия утверждение явившися. Темже со апостолы и преподобными ликующи, помощница являешися обидимым, плачущих утешение, заблуждших вразумление и монашествующих наставница. И нас, преподобная мати, молитвами твоими избави от бед и молися Христу Богу, да оставление грехов подаст верою и любовию чтущим святую память твою.
Слава, и ныне, Богородичен, глас тойже:
Б езневестная Чистая Богородице Дево, Едина верных Предстательнице и Покрове, от бед и скорбей и лютых обстояний всех избави, на Тя упование, Отроковице, имущих, и души наша спаси молитвами Твоими.
Степенна, 1-й антифон 4-го гласа. Прокимен, глас 4: Ч естна пред Господем смерть преподобных Его. Стих: Ч то воздам Господеви о всех, яже воздаде ми? Всякое дыхание: Евангелие от Матфея, зачало 43.
По 50-м псалме стихира, глас 6:
П риидите, вси людие, хвалу принесем преподобней, вопиюще: радуйся, Полотския земли похвало; радуйся, отрасль славная Владимира равноапостольнаго; радуйся, именитых родителей чадо богоизбранное; радуйся, путь иноческаго жития избравшая; радуйся, молящаяся Христу, о еже сохранити страну нашу и подати верным победы на враги и безбожныя супостаты, умирити мир и спасти душы наша.
Канон, глас 5.
Ирмос: К оня и всадника в море Чермное, сокрушаяй брани мышцею высокою, Христос истрясе, Израиля же спасе, победную песнь поюща.
С лава Тебе, Боже наш, слава Тебе.
А гнче Божий, Слове, даждь нам слово, недостойным Твоим рабом, да возможем воспети честное житие блаженныя Евфросинии в память пренесения мощей ея.
П реподобная мати наша Евфросиние, моли Бога о нас.
П реподобная мати, из младенчества прилежно обучившися Божественному закону, сосуд была еси Святаго Духа.
Слава: П реподобная мати, словесы евангельскими напитавшися, мир оставила еси, богатство и славу ни во чтоже вменивши, и всем непрестанно вопияла еси: возлюбите Бога и обрящете благодать вечную.
И ныне, Богородичен: С ветоносно возсия в сердцах, Пренепорочная, верою чтущих Тя, Божию Матерь, и озари день светоносный Христос, от Тебе плоть приемый, Богоневесто.
Ирмос: В одрузивый на ничесомже землю повелением Твоим и повесивый неодержимо тяготеющую, на недвижимем, Христе, камени заповедей Твох Церковь Твою утверди, Едине Блаже и Человеколюбче.
Х ристов глас услышавши, шествовала еси вслед Того заповедей, и отвергла еси попечения вся, и едина под сению святаго храма Богу беседующи чистейше, премудрости и совета благодать прияла еси.
М лада сущи возрастом телесе, путь добродетели восприемши, сим безбедно шествовала еси, закону новому Спасову повинующися и живоносным повелением Евангелия последующи.
Слава: Д ушу твою связавши любовию Христовою, земная возненавидевши вся мудре, водворилася еси, мати преподобная, в предуказанную ти от Ангела и последи созданную тобою обитель Спаса.
И ныне, Богородичен: С олнца мысленнаго, Всенепорочная, селение была еси, Божественными светлостьми нас благодатно озарившаго и мглу неразумия отгнавшаго, Приснодево.
Седален, глас 5:
П ресветлая и светоносная, преподобная мати Евфросиние, приспе твоя память, созывающи верных множество прославити и пети твое честное пренесение. Тебе убо просим: моли Христа Бога даровати нам велию милость.
Слава, и ныне, Богородичен:
П оем Тя, Богоневесто, славяще рожденнаго Тобою Христа Бога нашего, Имже избавихомся от лести диавола и всякия беды, Богородице Владычице, и верою вопием: помилуй Церковь и стадо Твое, Едина Всепетая.
Ирмос: Б ожественное Твое разумев истощание, прозорливо Аввакум, Христе, со трепетом вопияше Тебе: во спасение людей Твоих спасти помазанныя Твоя пришел еси.
В идевши преподобная стадо божественных овец своих совокуплено во множестве, радовашеся им, яко своему спасению, и на всяк день учаше сестры своя.
С тарыя учила еси, преподобная, терпению и воздержанию; юныя же – душевней чистоте и безстрастию телесному, говению благообразну, ступанию кротку, гласу смиренну, слову благочинну, ядению и питию малу и безмолвну.
Слава: Н аучила еси, преподобная мати, юныя при старейших молчати, мудрейших послушати, к старейшим покорение, к меньшим любовь имети, мало вещати, более же разумети.
И ныне, Богородичен: Н евместимый всеми, Пречистая, вмещается во утробу Твою, благостию спасая мя, погруженнаго во гресех.
Ирмос: О деяйся светом яко ризою, к Тебе утренюю и Тебе зову: душу мою просвети омраченную, Христе, яко Един Благоутробен.
В идевши себе преподобная в старости маститей, желанием возжеле посетити град, идеже пострада Христос Спас наш, поклонитися и облобызати Живоносный Гроб Христов и тамо скончати житие свое.
С лышавше вси людие о отшествии блаженныя, исполнишася скорби велия, и вси с плачем прихождаху к ней и моляху ю, да не оставит чада своя сира.
С л ава: П ритек на отшествие твое, преподобная, возлюбленный брат твой с супругою и чады своими, рыдает горце и, припад к ногама твоима, глаголет: госпоже моя, мати и сестро, почто оставляеши мя, свете очию моею и наставнице жизни моея.
И ныне, Богородичен: Н изложи, Мати Божия, крепость всех врагов, обидящих ны, невредимо Твое стадо спасай от приражений римскаго неправоверия, яко да по долгу Тя ублажаем.
Ирмос: Н еистовствующееся бурею душетленною, Владыко Христе, страстей море укроти и от тли возведи мя, яко Благоутробен.
В идевши толикий плач о отшествии твоем, блаженная, сладостно утешающи южики и духовная чада твоя, провещаваеши: не оставити хощу вы, но помолитися хощу о вас на месте страданий и преславнаго воскресения Христа Спаса моего.
Д ухом прозревши преподобная, яко дщери брата ея, юныя отроковицы Кириния и Ольга – сосуди суть избраннии Господеви, рече к ним пред отшествием своим: хощу вы обручити Жениху Безсмертному, яко да внидете в чертог Царствия Его.
Слава: У сладися отроковицам Киринии и Ользе беседа преподобныя, к нейже со умилением припадша, радостно рекоша: да будет воля Господня, да устроит святая твоя молитва о нас, якоже хощеши. Святая же призва епископа, иже и введе Киринию и Ольгу во церковь Спаса, и тамо постриже я, и обручи Христу.
И ныне, Богородичен: Т ы еси дверь Царя Небес и Храм славы Его, Дево Всепетая, отверзи нам двери милосердия и введи ны молитвами Твоими во обители Небесныя славы.
Кондак, глас 8:
В ерою и любовию твое честное пренесение празднующе, молимся, блаженная: сохрани и соблюди нас от всякия злобы и еретическаго обольщения, имаши бо дерзновение ко Владыце всех – Христу Богу. Егоже моли спасти православныя люди, молящыя тя, да вси вопием ти: радуйся, Евфросиние, невесто Христова всечестная.
А нгельски на земли житие совершила еси: чистотою и смирением, кротостию и терпением, милосердием и воздержанием Господеви угодила еси. И ныне во светлостех святых почивающи последи трудов твоих, приими от нас пение сие: радуйся, девственнице душею и телом; радуйся, наставнице предивная инокиням; радуйся, еще на земли сподобльшаяся ангельскаго видения; радуйся, от Господа чрез Ангела устроити обитель повеление приимшая; радуйся, со тщанием волю Господню исполньшая; радуйся, вся земная наслаждения мира сего Христа ради отвергшая; радуйся, Небесному Жениху Иисусу Сладчайшему себе обручившая; радуйся, в чистоте, постех и молитвах Тому послужившая; радуйся, безценное сокровище, Пречестный Крест, обители твоей во освящение и утверждение стяжавшая; радуйся, во трудех дневных и нощных житие твое совершившая; радуйся, в невечернем дни Царствия Божия ныне пребывающая; радуйся, Евфросиние, невесто Христова всечестная.
Ирмос: П ревозносимый отцев Господь пламень угаси, отроки ороси, согласно поющия: Боже, благословен еси.
В ручивши обитель твою преподобней сестре твоей Евдокии, паче же Христу Богу, радостно востекла еси на предлежащий путь со князем Давидом и южикою Евпраксиею, купно с ними воспевающи: Боже, благословен еси.
И зыдоша провождати преподобную вси людие града Полотска. Старии убо плакахуся о ней, яко о сестре, рекуще: увы нам, подпоро старости нашея, просвещение душ наших! Юнии же глаголаху: камо уходиши, свете очей наших? Кто нашу юность укрепит? Не остави нас сирых, в молитвах твоих не забуди нас. Услышавше же, яко преподобная не оставити их хощет, но помолитися о них, со умилением вопияху: таковую молитвенницу нам даровавый, Боже, благословен еси.
Слава: С рете преподобная на пути благовернаго императора Царяграда Мануила, иже, слышав о желании сердца ея, даде ей спутники – воины, охраняти ю на пути в Царьград. Тамо же любовне прият ю патриарх Лука, и с нею во храме святыя Софии воспеваше: Боже, благословен еси.
И ныне, Богородичен: О т девственных ложесн Твоих воплощься, Бог явися на спасение наше. Темже Тя Матерь ведуще, Богородице, правоверно вопием Ему: отец наших Боже, благословен еси.
Ирмос: Т ебе, Вседетелю, в пещи отроцы всемирный лик сплетше, пояху: дела всякая Господа пойте и превозносите во вся веки.
К упивши златую кадильницу и фимиамы, прииде преподобная во святый град Иерусалим и со многим умилением просяше блаженнаго патриарха, да сотворит он ей милость и да отворит врата Гроба Христова. Исполни убо патриарх прошение ея; святая же, пришедши ко вратом, падши на землю, с молитвою лобызаше я, радостно вопиющи: дела всякая Господа пойте и превозносите во вся веки.
Т реми деньми прихождаше преподобная во врата святая ко Гробу Спаса Христа, и, окадивши златою кадильницею Святый Гроб и поставивши зде кадило со многими дарми, моляшеся к Жениху Христу: сподоби мя, Владыко, скончатися на месте сем святем, приими дух мой во Святем граде сем и упокой мя на лоне Авраама, да со всеми угодившими Тебе воспеваю: дела всякая Господа пойте и превозносите во вся веки.
Слава: У слыша Господь, преподобная, моление твое и посла к тебе Ангела Своего, рекуща ти: блаженна ты еси в женах, и благословен труд твой; се уже отверсты двери райския, се уже собрашася и Ангели, держаще свещи, чающе твоего сретения. С теми убо и мы, недостойнии, о блаженнем успении преподобныя воспеваем: дела всякая Господа пойте и превозносите во вся веки.
И ныне, Богородичен: О браз носящи древле рождества Твоего, Дево Мати, пещь разжженная юноши невредимы сохрани, такожде и огнь Божественный не попали утробы Твоея, Чистая.
Ирмос: И саие, ликуй: Дева име во чреве и роди Сына Еммануила, Бога же и человека, Восток имя Ему; Егоже величающе, Деву ублажаем.
С родницы твои, преподобная мати Евфросиние, оплакавше твою честную кончину, омывше и опрятавше честныя мощи твоя, погребоша тя со святолепным пением во обители преподобнаго Феодосия, возвращшеся же во град Полотск, возвестиша о блаженнем успении твоем князем и людем и девам, собранным тобою во обители твоей. Тии же, со умилением слезы источающе, воздаша хвалу и благодарение Трисиянному Богу и начаша праздновати память блаженнаго успения твоего.
В идяще Российстии иноцы честныя обители Пресвятыя Богородицы град Иерусалим обстоим от поганых агарян, изнесоша честныя мощи твоя во пресветлый град Киев и водвориша я во обиталищи преподобных Антония и Феодосия Печерских чудотворцев, тамо Промыслом Божиим неврежденно и хранимы бяху до лет наших, во оправдание веры нашея, юже со Евфросиниею Полотская земля прият от князя Владимира.
Слава: Б ог в Троице славимый, в Егоже руце сердце царево, внуши помазаннику Своему, благочестивейшему государю императору Николаю Александровичу, благий совет: призрети на моление и вопль Полотския страны, да водворит на место земных подвигов честныя мощи твоя, яже мы сретающе, псаломски вопием: да даст Господь державному правителю нашему по сердцу его и весь совет его исполнит, да укрепит Белорусскую землю в Православии, и да запнет злохитрым латином в лукавстве их, и молитвами преподобныя да возвратит отторженныя коварством и насилием.
И ныне, Богородичен: С ветом Твоего милосердия озари мя, во тьме неразумия лежащаго, Едина Светодавца рождшая, Избавителя и Бога, святыя венчавшаго.
Светилен, глас 8:
Р авноангельно поживши на земли, равноангельну обрела еси светлость, тех бо боговиднаго сияния причастница была еси, с нимиже и радуешися всегда; предстоящи Престолу Святыя Троицы, присно молися о нас, верою и любовию совершающих празднество пренесения честных мощей твоих.
Слава, и ныне, Богородичен:
Щ едроты Твоя, Боже, на люди Твоя низпосли, молитвами Пречистыя Твоея Матере и всех святых, и, предстательством преподобныя Твоея Евфросинии, даруй нам велию милость.
На хвалитех стихиры, глас 8:
П риидите, вернии, хвалами сошедшеся, ныне составим торжество в честнем празднице чуднаго пренесения мощей преподобныя Евфросинии и, духовно празднующе, к ней возопиим: моли Христа Бога православному воинству нашему победы на безбожныя супостаты даровати, людем же крепкое противостояние иноверным подати, тебе бо ко Владыце теплу за ны молитвенницу и помощницу противу еретиков стяжахом, подающую православным утешение и велию милость.
Н ебеснаго Царя и Владыки Христа невеста была еси, преподобная Евфросиние, чистоту бо соблюла еси, без неяже не узрит Бога никтоже. Того ради и воздаяние по достоянию прияла еси: честное бо тело твое, во гробе лежащее, цело и нетленно соблюдеся, душа же к небесным ликостоянием прейде. Темже Христу Жениху молися присно о всех, чтущих тя любовию и празднующих пренесение многоцелебных мощей твоих, низпослати мир и велию милость.
П одвигом добрым подвизалася еси, течение и веру соблюла еси, преблаженная мати Евфросиние, прочее же соблюдеся тебе венец правды, имже венча тя истинный Мздовоздаятель Христос. Того моли, преблаженная, спастися обители твоей и всем сыновом Белорусския земли, пришествие твое во град Полотск светло торжествующим.
Слава, глас 6:
П риидите, вси благовернии людие, сошедшеся празднуим пренесение мощей преподобныя Евфросинии: сия бо измлада покори плоть духу и по Господним стопам изволи ходити, на земли праведное житие показа, Ангелы удиви, демоны же устраши и человеки просвети. К ней убо мы ныне рцем: радуйся, мудрая управительнице во спасение; радуйся, две обители, яко свещи, возжегшая; радуйся, светом жития твоего просветившая страну Полотскую; радуйся, бывшая во украшение пещер Киевских; радуйся, молением граждан полотских во удел твой возвратившаяся; радуйся, Евфросиние предивная, земный ангеле, ныне на небесех предстоящи у Престола всех Царя, Христа Спаса Жениха твоего, к Нему молися за Полотскую страну и за вся люди православныя, верою и любовию празднующия твое честное пренесение, во еже спастися им.
И ныне, Богородичен, глас тойже:
Б огородице, Ты еси Лоза Истинная, возрастившая нам Плод Живота, Тебе молимся: молися, Владычице, со святыми апостолы помиловати души наша.
Славословие великое и отпуст.
На литургии
Блаженны от канона, песнь 3-я и 6-я. Прокимен, глас 7: Ч естна пред Господем смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Евангелие от Матфея, зачало 10. Причастен: В память вечную будет праведник.
Печатается по изданию: Служба на пренесение честных мощей преподобныя матере нашея Евфросинии, игумении Полотския, от града Киева во град Полотск. Полоцк, 2008.